JOUES DE LOTTE

mat enger Vanillszoos op Mieresspargel

Wéi Zäit verflitt, mir si schonn erëm am Dezember ukomm a Chrëschtdag steet kuerz virun der Dier. D‘Fest vun der Léift an dem Zesumme sinn. Ech freeë mech erëm flott Momenter zesumme mat der Famill a mat Frënn di zur Famill gi sinn ze verbréngen. De passende Soundtrack leeft elo scho bei mir erop an erof:

„Last Christmas, I gave you my heart

But the very next day you gave it away

This year, to save me from tears

I’ll give it to someone special“

Mäin Artikel haut presentéiert en festlechen Haaptplat deen Iech jo villäicht Inspiratioun gëtt wann dir nach no engem sicht 🙂

Joues de Lotte mat enger Vanillszoos op engem Bett aus Mieresspargel 
An der Haaptroll: Lophius piscatorius oder Seeteufel op Däitsch a mir kennen en oft éischter ënnert dem Franséischen Numm Lotte. Et ass ee moren, festen an aussergewéinlechen aromatesche Fësch, deen och e bësse méi deier ass.
Ganz besonnesch ass dass en bis un seng Wirbelsail absolut Sprenzefräi ass.
Ech hunn mech fir Joues de Lotte entscheet well all Fëscher déi als Delikatesse bezeechent!
An der Nieweroll: Mieresspargel, Salicornia ass eng flott Kombi fir mam Fësch. Nom kafe kuerz ofspullen an di verdréchent Staangen aussortéieren.
Dat ganzt gëtt vun enger Vanillszooss ofgerënnt well dat fir mech perséinlech einfach super zu Chrëschtdag passt.
E bëssi Geméis a Reis dobäi an schonn huet een ee flotten an awer liichte Plat dee gutt no enger klenger Entree passt an och nach Plaz léist fir di aner Leckereien di et zu där Zäit nach ginn. Et ass och kee komplizéiert Rezept sou dass een net muss Stonnen an der Kiche stoen an nach e bëssen Zäit fir seng Gäscht huet.
Sou dann dréine mir elo d’Chrëschtmusek op a lass geet et mam kachen. 
Fir Zooss :
  • 1 Vanillsstaang
  • 20 cl dréchene wäisse Wäin
  • 15 cl Ram
  • 2 IL Oliven ueleg
  • E bësse geriwwen Zitrouneschuel
  • Gedréchente Knuewelek
  • 1 cm frëschen Ingwer
  • Muskotnoss
  • Salz
  • Peffer
1) De wäisse Wäin an en Dëppe schëdden.
2) Vanillsstaang an der Längt duerchschneiden a Kären eraus krazen a béid mam Ingwer mat an d’Dëppe ginn.
3) Dëppen op niddereger Temperatur op Kachplack stellen a waarden dass de Wäin eng  1ste Kéier kacht
4) Wann en kacht d’Ram an de Recht vun de Gewürzer bäifügen an alles gutt opréieren
5)Kachplack op minimum stellen an d’Zooss 35-40 Minutte lues goe loossen a reegelméisseg opréieren
6) No 40 Minutten d’Vanillsstaang an den Ingwer eraushuelen a schonn ass d’Zooss prett
Fir de Fësch: 
  • 1 EL Oliven Ueleg
  • 8 Joues de Lotte
  • Salz Peffer
  • 1 schotts wäisse Wäin
  • +/-200-250g Salicornes
Ier een de Fësch mëscht kann een an der selwechter Pan d’Salicornes kuerz mat e bëssi Olivenueleg goe loossen, dëst gëtt Gout oof.  Opgepasst net salze well déi si schonn zimlech gesalzt!
1) Ganz wichteg: op de Joues de Lotte ass esou eng dënn Haut déi een onbedéngt muss erof huele well de Fësch soss zesumme geet an zéi bleift.
2) Den Ueleg gutt waarm gi loossen ier een d’Joues de Lotte an de Mix mat dobäi gëtt an ubréit.
3) mam Wäin ofläschen an dat ganzt e bësse reduzéiere loossen ier een et liicht salzt a peffert
(Ech hunn e Mieresfriichte Mix mat drënner gemëscht – dat ganzt éischter als Deko mee dat muss een net)
D’Bäilagen iwwerloossen ech Iech, do kënnt dir huele wat dir gären hutt. Ech hunn mech bei mengem Plat fir Muerten, Brokkoli a Wäiss Rommel entscheet.
Ech hunn déi einfach mat e bësse Salz a Peffer, Waasser a Botter am Schäffche gemaach: 25-30 Minutten op 180 Grad. De Basmati Reis hunn ech ganz einfach ewéi et um Pack steet gekacht.

Dëst war meng Propose fir en festlechen Haaptplat 🙂 Ech hoffen en huet Iech gefall an huet Iech Loscht ginn en nozekachen.  Ech wënschen Iech e gudden Appetit an eng schéi Chrëschtzäit. 

Tags:
Sabina

Sabina

Eng vu menge grousse Leidenschaften ass Kachen an ech loosse mech staark beaflosse vu mengen italienesche Wuerzelen, déi aus Puglia a Süditalien stamen. Fir mech ass Kache wat fir aner Leit Yoga ass.

Ech kann dobäi entspanen a mengen Iddie fräie Laf loossen. Ee weideren Hobby vu mir ass den Theater wou ech net nëmme matspillen, mee mech och an engem Comité engagéieren.

Mech faszinéiert um Theater, dass ech mech an aner Personnagë versetze ka besonnesch am Cabaret, an dobäi de Leit en Laachen an d'Gesiicht zaubere kann.

Hei presentéieren ech Iech meng Rezepter an hoffen dir hutt vill Spaass beim Nokachen.

Leave a Comment

This site uses Akismet to reduce spam. Learn how your comment data is processed.