fbpx

Buch & Interview: De Wëlle leeft am Bësch – Diane Orban & Myriam Karels

  • Home
  • Book Corner
  • Buch & Interview: De Wëlle leeft am Bësch – Diane Orban & Myriam Karels

Op der Sich no engem flotte Kannerbuch ass mir de wëlle Mann begéint – dat zwar net grad am Bësch – mee an enger klenger Epicerie an engem klenge léiwen Duerf wou och ganz vill Bësch ronderëm ass.

Abee ech wuer virwëtzeg an hunn d’Buch, dat Enn 2019 vun den Editions Schortgen publizéiert gouf, opgeschloen. Wat direkt begeeschtert sinn déi flott Illustratioune mat klenge léiwen Detailer déi direkt all Kannerhäerz mee och dat vun den Erwuessene méi héisch schloe loossen.

D’Buch zielt d’Geschicht vum Charel a sengem Brudder dem Jim – deenen et geet, wéi et wuel ville Kanner de Moment geet déi net eraus kënnen. Och wann den Hannergrond en aneren ass, well bei hinnen ass et kee béise Virus mee dat schlecht Wierder wat hirer Entdeckungsfreed dobaussen am Wee steet. Déi 2 Bouwe fanne ganz uewen, ënnert dem Daach vum Haus hir eege Welt, an erliewen eng flott Aventure. Ech well Iech net ze vill verroden, mee d‘Geschicht déi huet et a sech. 🙂

D’Opdeelung vun de Säiten ass eng flott Entdeckung vir d’Kanner. Et muss een nämlech net dat ganzt Buch direkt beienee liese well op enger Säit zum Beispill den Text an e puer Sätz bei e puer Illustratioune steet, an een dat de Kanner och dann a klenge Portiounen erziele kann.

De Vokabulär ka vum Lieser/in erkläert gi wann d’Kanner net direkt alles sollte verstoen. Mir huet dëst léift Buch op alle Fall op eng flott Manéier ons interessant Sprooch mat ville wonnerbaren Ausdréck nees méi no bruecht.

Ech denken, dass dëst Buch, zemools elo,  den Entdeckungsgeescht an d’Fantasie vun de Kanner kann ureegen.

Ech hunn och kuerz mat den Auteure geschwat an hinnen e puer Froe gestallt.

Ween hat d’Iddi zu ‚de Wëlle leeft am Bësch‘?

D’Iddi fir de “Wëllen” ass am Fong, wärend engem Spillnomëtteg mat eise Kanner entstanen. Wärend d’Kanner gespillt hunn, hu mir iwwer lëtzebuergesch Kannerbicher geschwat, dass et där zwar ëmmer méi ginn, mä dass et vill Iwwersetzunge sinn a manner där, déi original op lëtzebuergesch sinn.
Am Ufank hu mir éischter am Geck gesot dass mir jo eist eegent Buch maache kéinten. An aus dësem “Geck” ass dunn tatsächlech e Buch entstanen.

Dem Diane war et wichteg den Aspekt vun der Fantasie mat anzebannen, fir ze weisen, dass een aus den alldeegleche Saachen aus dem Haus vill maache kann, dass een net ëmmer déi neisten an héich technesch Spillsaache brauch fir sech ze ameséieren.
An d’Myriam wollt déi lëtzebuergesch Ausdréck abréngen, well säi Jong grad eng Phas hat, wou hien déi Saachen, déi Erwuessener gesot hunn, extrem witzeg fonnt huet, well hien sech se bildlech virgestallt huet.

Wéi ass Äer Zesummenaarbecht zustane komm?
Mir kennen eis aus dem Lycée, wou mir zesummen op der Première artistique waren. Duerno hu mir eis aus den Ae verluer a réischt am Congé parental fir Spillnomëtteger mat eise Kanner erëm getraff.

Wat war dat schwéierst um Buchprojet?
Dat schwéierst um Buchprojet war, sech ze entscheeden an eens ze ginn, wéi eng Ausdréck mir fir d’Geschicht benotze sollen a fir wéi eng leider keng Plaz méi ass.

Wie laang hutt Dir ongeféier um Buch geschafft?

Tëscht dem éischte Spillnomëtteg, wou mir vun där Iddi geschwat hunn bis zum fäerdeg Buch, sinn 20 Méint vergaangen.

Wat ass, fir Iech, den Haaptmessage vun der Geschicht?

Den Haaptmessage läit net an der Geschicht selwer, mä éischter am Konzept vum Buch: Mir hoffen, dass d’Kanner an hir Elteren, oder wien och ëmmer d’Buch mat de Kanner liest, engersäits dozou ugereegt gi rëm méi lëtzebuergesch Ausdréck am Alldag ze benotzen an anersäits rëm zou loossen hirer Fantasie fräie Laf ze loosse fir mat “banale” Saache spannend Geschichten ze erliewen.

Ech soen villmools Merci fir de klengen Interview!

 

An wann Dir nach e bëssi méi iwwert dëst flott Buch wëssen wëllt, dann ginn mir Iech R-V op der Facebook Säit vum Buch.

Tags:
Martine

Martine

Musik, Natur, Sport, Kunst und Kultur und vor allem Lesen. Dies sind einige meiner vielen Interessen. Geboren in Luxemburg und wohnhaft im Westen, bin ich in der Mitte des Lebens angekommen und genieße dessen Vielfalt jeden Tag aufs Neue.    Die Literatur ist für die Menschheit das, was Träume für den Einzelnen sind. Isabel Allende  

Leave a Comment

This site uses Akismet to reduce spam. Learn how your comment data is processed.