Moschter selwer maachen

Wien brauch net e gudde Moschter. Ob beim Wupp oder fir eng Moschterzooss…Mhmmm Wäinzoossiss mat Moschterzooss.😋

Ech maache mäin Moschter ëmmer sëlwer well esou kann ech och de Goût ganz genau esou beaflosse wéi ech et gären hunn. Ech perséinlech hunn zB schaarfe Moschter gären, mee en dierf net esou schaarf sinn, datt en an der Nues brennt.

Et ass och ganz einfach Moschter selwer ze maachen, ech verroden dir elo wéi ech et ëmmer maachen:

Et brauch een:

• 250 gr Moschterkären
• 50 gr Zocker oder Hunneg
• 15 gr Salz
• 200 ml Waasser
• 150 ml Wäin-Esseg
• eventuell Gewierzer no Loscht a Laun

A wéi gëtt aus all dem elo e leckere Moschter?

Perfekt wär et wann een eng al Kaffismillen hätt, an där een d’Moschterkäre schéi lues muele kéint. Ech hu keng a muele mir d’Moschterkären a menger Kichemaschinne. Ech stellen se ganz lues an a maachen oft eng kleng Paus. Esou ginn aus de Kären e Moschtermiel. Et ass immens wichteg, dass dobäi alles schéi lues leeft, fir datt dëst Miel sech net erhëtzt. Wann et nämlech ze waarm gëtt, verflitt den Ueleg an de Goût.

An der Tëschenzäit hunn ech d ‘Waasser an den Esseg kuerz opgekacht an awer och nees ofkille gelooss. Dës Flëssegkeet soll manner wéi 30°C hunn.

D’Moschtermiel, den Zocker, d’Salz an dee Recht vun de Gewierzer (fir déi Dir Iech entscheet hutt) mëschen an da lues d’Waasser-Esseg Mixtur drop schëdden a gutt réieren.

A schonn ass de Moschter fäerdeg, also bal. E muss nach a propper a steriliséiert Glieser mat Deckel gefëllt ginn an e bësschen zéien.

Steriliséiert Glieser: Ech huele meng al propper Gebëss-Gliesen an tauchen déi an hier Deckelen emol kuerz a kachend Waasser.

Ech hoffen ech hunn Iech Loscht ginn, och hausmaacher Moschter ze maachen!