Magesch Baguette

Eng magesch Baguette? Wat ass un enger Baguette magesch?

Un dëser Versioun vun enger Baguette ass et, wéi einfach se ze maachen ass. Et geet Ratz-Fatz a schonn ass se fäerdeg. Okay, ganz éierlech… Esou schnell geet et och net, mee et ass dofir ganz einfach a mat ganz wéineg Aarbecht. An se schmaacht!

Wat brauchs du?

• 400 gr Miel
• 1 TL Salz
• 1-2 TL Zocker
• 300 ml wotlecht Waasser
• 10 gr Hief (ongeféier ¼ vum engem Wierfel Frëschhief)

Méi brauchs du net.

Den éischte Schrëtt ass mega einfach. Alles beienee tippen an gutt mëschen.

Du muss dësen Deeg net laang knieden : just alles esoulaang knieden an triwwelen bis et eng grouss Bull Deeg ass.

Elo hues du den ustrengendsten Deel gepackt.

Deck deng Schossel mam Deeg zou a stell alles iergendwou hin wou et fir den Deeg schuckeleg ass. Dat ka bei enger Heizung sinn oder bei net méi wéi 30°C am Bakuewen.

Looss him elo 2 Stonne seng Rou!

No där klenger Paus, hëls du den Deeg virsiichteg aus der Schossel a Deels en an 3 ongeféier gläich grouss Stécker. Aus all Stéck méchs du, an deem’s du den Deeg rulls, eng Wurscht. Esou eng Wurscht soll ongeféier 35-40 Zentimeter hunn. Lee déi 3 Stécker, mat genuch Ofstand, ob en Bakblech a looss hinnen nach emol e puer Minutte fir sech ze erblosen.

Wärend där Zäit wierms du den Bakuewen fir. An zwar ob 240°C Uewen- an Ënnerhëtzt.

Wann den Uewe waarm genuch ass, kommen den Baguetten fir 20 Minutten an den Uewen.

Proffitipp 1:

Mat engem ganz schaarfe Messer kanns du e puer , 1 Zentimeter déif, Rillen déi Deeg-Wurschte schneiden. Da gesinn deng Baguette duerno aus wéi vum Bäcker.

Proffitipp 2:

D’Haut gëtt nach méi krupseg wanns du eng feierfest Schossel mat Waasser, vun Ufank un, an den Uewe stells.

GUDDEN APPETIT!